7.दूर माझा गाव
दूर माझा गाव ,दूर माझा गाव
दूर माझा गाव,माझ्या काळजाचा ठाव
जात्यावर ओवीत गाते माय माझे नाव
सावली ग्रीष्मात मांडी कवडशांचा डावरे
बरसूदे पाऊस वारा घे शिरावर घावरे
रक्षिण्याला गाव स्वतःला गाव घेईल धाव
दूर माझा गाव.......
डोंगराच्या पायथ्याशी शेत माझं रांगतं
पीत पाणी पीक माझं त्या नभाला सांगतं
दे धन्या आभाळमाया झड सुखाची लाव
दूर माझा गाव........
नांगराचा फाळ उठवी ढेकळांच्या पंगती
चांदणे पेरीत मोती प्रेम माया संगती
तीच ममता पोषिते मग रंक आणिक राव
दूर माझा गाव.........
पंख फुटता जी उडाली दूर गेली पाखरे
परतुनी येतील दारी माऊलीची आसरे
आसवांच्या सागरातील ने तीरावर नाव
दूर माझा गाव.........
एकदा येऊन जारे गाव हा पाहून जा
पाहुण्या गावात माझ्या एकदा राहून जा
बघ तुला भावेल इथला भाव भोळा भाव
दूर माझा गाव.........
कोणत्याही टिप्पण्या नाहीत:
टिप्पणी पोस्ट करा