5.माझा माळशेज घाट
माझा माळशेज घाट
घाट नागमोडी वाट
वाटंवर मन घाटांतून....सळसळतंय
माझा माळशेज घाट
घाटमाथ्याचा ललाट
ललाटावरून पाणी कसं.... खळखळतंय
माझा माळशेज घाट
घाट डोंगराची लाट
लाट लाटेवर कसं भय....डुचमळतंय
माझा माळशेज घाट
घाटामधी धुकं दाट
दाटलेल्या धुक्यामधी सुख....घुटमळतंय
माझा माळशेज घाट
घाटामधली पहाट
पहाटेच्या धुक्यामधी हीव....विरघळतंय
माझा माळशेज घाट
घाटाचा हा न्यारा
थाटामाटात चांदणं कसं....निरमळतंय
माझा माळशेज घाट
त्यात वारं हे भन्नाट
भनानल्या शिवारात कुणी....तळमळतंय
माझा माळशेज घाट
खोल द-यांचा हा काठ
काठावार असं वाटं जसं....मळमळतंय
माझा माळशेज घाट
रातरीच्या उदरात
थरथरारलं तम कसं....कळवळतंय
माझा माळशेज घाट
वनराई घनदाट
दाट करवंद जाळं कसं....फळफळतंय
माझा माळशेज घाट
घट मेघ डोईवर
वर भरतो घागर शेत....हिरवळतंय
माझा माळशेज घाट
बळीराजाचा मैतर
मैतराचं खळ आनंदून....दरवळतंय
कोणत्याही टिप्पण्या नाहीत:
टिप्पणी पोस्ट करा